2000 ولا 5000 يا فندم ؟!

السلام عليكم ورحمة الله وبركاته ..

من كام أسبوع كنت بلف في التليفزيون على حاجة تنفع الواحد يشاهدها من غير أذى

.. المهم ..

سمعت إن آخر مهلة لتقديم الإقرار الضريبي على الثروة العقارية آخر ديسمبر .. واللي هيتهرب هيدفع 5 آلاف جنيه .. و2000 جنيه للمتخلفين ..!!

يعني لو عندك عقار يافندم .. هتقدم الإقرار الضريبى دي .. وطبعا دى مش كان كلامهم في بداية ما اعلنوا عن الضريبة ..

طب لو عندك شاليه او اوضة متأجره وبتنتفع منها .. برضه هتقدم الضريبة ..

عندك أرض فاضية مش بتعمل فوقها حاجة لكن بتستخدمها جراح مثلا او مشاتل برضه هتقدم إقرار وهتدف الضريبة ويا ويلك لو كانت غير مستغله فالضريبة هتزيد وتزيد عليها ..

يعني الواحد يسافر بره طول عمره ويحوش له قرشين ويرجع مصر يبني له بيت يتجمع فيه ويجمع أولاده حواليه يبص يلاقي حكومتنا المصون في وشه بتقول له ادفع يا جميل ..!

على أي أساس دى .. ومين يرضى بدى أصلا ..

يا اخواتنا احنا مسلمين وعايشين على ارضنا ليه هتدفعونا جزية زينا زي غيرنا ..

ولا دى إتاوه بقى على كله .. إرحموا نفسكم بجد ربنا يريحنا منكم ..

شوية وتعملوا لنا ضريبة على الاولاد اللي عنده طفلين يدفع ضريبة عليهم ..

الأطفال بقت بتتولد مديونه الله يسامحكم .. الناس كلها حالتها تصعب على الكافر يا (شرعيين الحكم).!

وبعدين فين الإصلاحات اللي بنشوفها .. مش الضرايب دى برضه لمصلحتنا أولاً .. لو حد شايف إن فيه مصلحه حصلت له مادية أو معنوية يرفع ايده ويتكلم ..

ربنا يكرمكم آخر كرم ..

وعجبي على حكومتنا السكره .. وتحيا مصر المـــخــــروسة ..